To de eerste Drachtenweek, de 1951 as „Deutsche Trachtenwoche“ in Niestadt in Holsteen dörchföhrt worrn is, wörr de Niestädter Volksdanzkring gründt.

Uns Niestädter Drachtenweek hett af 1952 „Europäische Trachtenwoche“ heten un is nu „europäisches folklore festival“ nöömt.

De Maten vun’n Niestädter Volksdanzkring sünd för dat Torechtmaken un Dörchföhren vun de Drachtenweken in all de Johren  heel wichtige Hölpslüüd west un sünd dat ok hüüt noch. Dat sall ok in Tokunft geern so blieven.

1951 weern dat blots twölf junge Lüüd, de den „Jugendvolkstanzkreis“ gründt hebbt. Intwüschen sünd wi all över tweehunnert Maten, un dor danzt un speelt üm un bi de halven vun.

Dat gifft bi uns veer Danzkrings:

De Lütten-Kring: De Göörn mööt tominnst 4 Johrn oolt sien.

De Meern-Kring: Dat sünd de "groten Lütten" in‘t Öller vun 9-17 Johrn.

De Groot-Kring: Dat sünd de groten Lüüd, de öller sünd as 18 Johrn.

De Senioren-Kring: Dor danzt de Ölleren un Ehemaligen.

 


Bi uns warrt de Danzmusik to de Volksdänz jümmers noch vun Hand maakt, un dor sünd wi bannig stolt op. Dat sall ok heel geern so blieven. Muskanten, de Höög un Pläseer an’t Spelen vun Volksdänz hebbt, sünd bi uns jümmers vun Harten willkamen.

Wi hebbt en Dracht bi Optreed an, de de Grünnungsmaten 1951 op dat "Gut Testörp" in’n Kreis Oostholsteen funnen hebbt. De hebbt fröher de Melkdeerns op de Güter vun’n Kreis Oostholsteen an de Festdaag dragen. En Jungsdracht geev dat wull nich. Dorüm hebbt uns Dänzer en Dracht sniedert kregen, de to de Deernsdracht goot passen deit.

Wi hebbt ok en Fischerdracht. De hebbt de Fischerlüüd in Niestadt in Holsteen un in Oostholsteen wull fröher so dragen.

Wi weern al as Gäst in vele Länner vun Europa un wi hebbt ok al op vele Festivals in Düütschland danzt. Wi höögt uns bannig, wenn wi niege Frünnen finnen doot.

 

Du kannst geern Kontakt opnehmen to uns Vörsittersche or kumm doch eenfach mal to’n Övensavend vorbi. Harlig willkamen!

Margit Giszas
Neustädter Volkstanzkreis
Brückstraße 23
23730 Neustadt in Holstein
Tel.: 04561 4379
Mail: vorstand(at)nvtk.de

 

(Text: besten Dank an "Heiner" Evers, unsere ehemaligen Vorsitzenden)